Eit unikt kulturminne i Sunndal
Flatvadteina er ei gammal lakseteine som vart ferdig restaurert til fiskesesongen 2008. Teina er bygd på ein plass i elva som det må ha stått teiner i hundrevis av år. No er det berre to teiner att i elva. På det meste kan det ha vore 50-60 slike teiner i vassdraget. Flatvadteina representerer ein fangstkultur som før hadde mykje å seie for folket som levde i bygda. Teinene var effektive fangstreiskap. Elva var rik på laks. Teinene representerte matauk og valutainntekt til bygdefolket. Det ein ikkje åt, kunne seljast.
No er det sportsfisket som dominerer. Det er lite laks. Kiloprisen er relativt liten, og ei teine er dyr å bygge og drive. Men har vi råd til å la denne fangstkulturen forsvinne heilt? Vi trur svaret er NEI!
Ei lakseteine bygd etter gammal Driva-oppskrift er unik, både kva gjeld design og byggemåte. Dessutan er det svært få teiner att i andre elver i landet. Vi har ikkje råd til å la slik kultur forsvinne. Dessutan trur vi at det, trass i låg laksepris, lite laks og høge driftskostnader, vil vere fullt mogleg å drive teina ved å drive fangst på denne gamle måten. Teina vil altså vere eit levande kulturminne i tillegg til å vere unik. Vi er rimeleg trygge på at mange synes det er interessant at teina får eksistere i elva. Om ikkje anna, så er teina blitt eit blikkfang i Sunndal. Det i seg sjølv har ein ikkje så reint liten verdi, vil vi hevde.
Sponsorar
Flatvadteina er ferdig restaurert.
Etterlysingar
Veit du noko om/frå andre teiner i Driva?
- Fortel oss det du hugsar.
- Alt av interesse: Bilete - historier omkring teinefangst eller bygging. Noko du eller andre har opplevd.
- Vi vil gjerne publisere stoff om teinene her på desse sidene. Vil du ikkje at stoffet ditt skal publiserast her, men berre skrivast ned, vil vi også respektere det. Det viktigaste er dokumentasjon for ettertida.
- Ta kontakt med oss. Vi hjelper til med å skrive det ned.
Kan du noko om teinebygging?
Ta kontakt med oss og fortel kva du veit om det å bygge teine. Dette fordi vi har sett at detaljar kunne gjerast ulikt, også på teiner i Sunndal. Flatvadteina er no ferdig restaurert. Vi har prøvd å gjere dette mest mogleg autentisk. Noko kunnskap er arva, noko er kopiert, noko etter andre sine råd, og noko er lært undervegs. Vi har først og fremst lært mykje om korleis Flatvadteina vart bygd – og mindre om andre teiner. Byggemåten er dokumentert med bilete, video og tekstar. Men for all del: Har du kunnskap om teinebygging, synes vi det er viktig at også dine kunnskapar blir dokumentert.
Sponsor for Flatvadteina?
Flatvadteina er ferdig finansiert og restaurert. Vi er over i driftsfasen. Det vil medføre kostnader å drive Flatvadteina. Først og fremst er det eit kulturminne som skal drivast – ikkje ei fangstinnretning, der det måtte gjelde å håve inn mest mogleg fisk. Flatvadteina vil vere eit blikkfang. Kan hende du synes det er interessant å syne fram verksemda di som sponsor saman med Flatvadteina? Kanskje vi kan ha felles nytte av kvarandre? Ta gjerne kontakt, så kan vi prøve ut om det kan vere interessant?